وزیر اطلاعات آزاد حکومت ریاست جموں وکشمیر پیر محمد مظہر سعید شاہ نے کہا ہے

وزیر اطلاعات آزاد حکومت ریاست جموں وکشمیر پیر محمد مظہر سعید شاہ نے کہا ہے کہ آزادی اور غلامی میں فرق دیکھنا ہے تو مقبوضہ کشمیر کو دیکھیں جہاں کا وزیراعلٰی اپنی حکومت ہونے کے باوجود اپنی مرضی سے شہداء کی قبروں تک نہیں جا سکتا۔ اپنی ہی حکومت میں اپنے ہی شہر میں قابض فورسز سے دھکے کھا کر دیواریں پھلانگتے عمر عبداللہ کو لازمی دو قومی نظریے کا احساس ہوا ہوگا۔ ہم اس واقعے کی مذمت کرتے ہیں، قابض فورسز کے مکروہ اقدامات شہداء کے مشن کو نہیں روک سکتے۔ اللہ رب العالمین کا شکر ہے ہم آزاد فضاء میں پیدا ہوئے۔آزادی اللہ کی طرف سے دیا گیا ایک انمول تحفہ ہے۔ عمر عبداللہ کے ساتھ جو واقعہ ہوا اس طرح کے واقعات آئے روز مقبوضہ کشمیر میں رونما ہوتے ہیں۔ کشمیریوں کی توہین قابض فورسز کا معمول ہے۔ان خیالات کا اظہار انہوں نے اسلام آباد میں ایک وفد سے ملاقات کے دوران گفتگو کرتے ہوئے کیا۔ وزیر اطلاعات آزاد کشمیر پیر محمد مظہر سعید شاہ نے کہا کہ ہم نے تو آزاد فضاء میں جنم لیا، ہمارے لئے شاید اس کی اہمیت کا اندازہ لگانا مشکل ہے کہ آزادی کتنی بڑی نعمت ہے، مقبوضہ کشمیر کے عوام سے پوچھیں کہ آزادئ کی قدر کیا ہے ۔ مقبوضہ جموں و کشمیر کے عوام اپنی ہی سرزمین پر آزادی سے سانس نہیں لے سکتے اور وہاں کے ہزاروں نوجوان کئی سالوں سے بھارتی جیلوں میں قید ہیں۔ وزیر اطلاعات نے کہا کہ پاکستان عظیم نعمت خداوندی اور جغرافیائی اعتبار سے انتہائی اہمیت کا حامل ملک ہے۔ ہمیں چاہئے کہ ہم اس آزادی کی نہ صرف خود قدر کریں بلکہ اپنے بچوں کو بھی آزادی کی قدر و قیمگ کا درس دیں۔ انہوں نےکہا کہ مقبوضہ جموں وکشمیر کے عوام کی جدوجہد لازوال ہے، وہاں کے لوگوں نے آزادی کیلئے اپنا سب کچھ قربان کر دیا ہے۔ مقبوضہ جموں کشمیر کے عوام کی قربانیاں انشاء اللہ ضرور رنگ لائیں گی۔